Cevdet Yılmaz: Türkiyənin qarşısında Zəngəzur dəhlizi də daxil olmaqla yeni imkanlar açılır
Müasir Türkiyə Zəngəzur dəhlizi və “İnkişaf Yolu” layihəsinin inkişafı da daxil olmaqla çoxsaylı imkanlarla qarşılaşır.
“TV1” xəbər verir ki, bu barədə vitse-prezident Cevdet Yılmaz Ankarada Türkiyə Podratçılar Birliyi tərəfindən təşkil edilən “Türkiyə inşaat sammiti”nin iştirakçıları qarşısında çıxış edərkən bildirib.
Regional proseslərdən danışan Yılmaz münaqişələrin qonşu dövlətlərin iqtisadiyyatına və humanitar proseslərinə böyük təsir göstərdiyini qeyd edib.
“Müharibələr heç kimə fayda vermir, onlar ancaq dağıntılara səbəb olur. Biz şəhərlərin bərpasını və insanların rifah halının yaxşılaşmasını görmək istəyirik. Əminəm ki, qarşıdurma dövrünün sonu ilə dövlətlərin yenidən qurulması səyləri sürətlənəcək və Türkiyənin tikinti sektoru üçün yeni perspektivlər açılacaq”, – deyə o bildirib.
