Fransanın cənubunda meşə yanğını 2 500 hektar ərazini əhatə edib
Fransanın cənubundakı Var departamentində baş verən yeni meşə yanğını 2 500 hektar əraziyə yayılıb. Yerli hakimiyyət orqanları təxminən 400 sakini təxliyə etmək məcburiyyətində qalıb.
“TV1” xəbər verir ki, bu barədə TF1 telekanalı məlumat yayıb.
Yanğın iyulun 22-də günorta saatlarında Kotinyak kəndi yaxınlığındakı dağlıq ərazidə başlayıb. Alov qısa müddətdə yüzlərlə hektar sahəyə yayılaraq bir neçə yaşayış məntəqəsi üçün təhlükə yaradıb. Nəticədə bu və ətraf kəndlərdən 400 nəfər təxliyə olunub. Bundan əlavə, təxminən 2 300 ev təsərrüfatı elektrik enerjisiz qalıb. Bir neçə ev tamamilə yanıb. Yanğının söndürülməsinə Var departamentində 1 200 yanğınsöndürən və xilasedici cəlb edilib.
Həmçinin dörd yanğınsöndürən təyyarə və onların fəaliyyətini əlaqələndirən bir helikopter havaya qaldırılıb.
