Tramp İranla müharibəni dayandırmaq üçün Si Çinpin və Putinlə danışacaq
ABŞ prezidenti Donald Tramp gələn həftə Çinin Şenjen şəhərində keçiriləcək Asiya-Sakit Okean İqtisadi Əməkdaşlıq Təşkilatının (APEC) sammitində çinli və rusiyalı həmkarları Si Çinpin və Vladimir Putinlə görüşəcəyini düşünür.
“TV1” xəbər verir ki, “Əl-Cəzirə”nin yaydığı məlumata görə, bunu ABŞ lideri Floridanın Vest Palm Biç şəhərində jurnalistlərə açıqlamasında deyib.
“Görüşlərdən biri Prezident Putin və Prezident Si ilə olacaq. Biz bir çox məsələləri, o cümlədən nüvəsizləşdirməni müzakirə edəcəyik. Amma danışacağımız mövzular çoxdur. Biz İrandakı müharibəni bitirməyə çalışırıq və buna nail oluruq. Çünki tək etməli olduğumuz şey oranın nəfəsliyini kəsməkdir və biz bunu edirik”, – deyə ABŞ Prezidenti qeyd edib.
Tramp ABŞ-nin İranın quru tədarük marşrutlarının qarşısını almağı hədəfləyən “Dəmir Qapı” (Operation Iron Gate) əməliyyatının qüvvədə olduğunu qeyd edib: “Bu o deməkdir ki, quru yolu ilə heç nə daxil olmur. Bildiyiniz kimi, dəniz blokadası vasitəsilə də su yolu ilə heç nəyin daxil olmasına imkan verilmir”.
1989-cu ildə təsis edilmiş APEC-in tərkibinə Avstraliya, Kanada, Yaponiya, Çin, Rusiya və ABŞ da daxil olmaqla 21 ölkə üzvdür. Təşkilatın liderləri hər il bir araya gəlirlər.
