Nepal daşqın nəticəsində dəymiş ziyana görə 20 milyon dollar tələb edir

Nepal daşqın nəticəsində dəymiş ziyana görə, 20 milyon dollar tələb edib və ətraf mühiti əsaslı şəkildə çirkləndirənləri “ayılmağa” çağırıb.

“TV1” xəbər verir ki, ölkənin xarici işlər naziri Şisir Xanal bəyan edib ki, qlobal emissiyaların 0,1%-dən az hissəsini təşkil edən Nepal iqlim xaosunun bədəlini təkbaşına ödəməməlidir.

Ölkə konkret günahkarların adını çəkməyib, halbuki əvvəlcə Çin və Hindistanı iqlim böhranına əsas töhfə verənlər kimi göstərmişdi.

“The Guardian”ın məlumatına görə, səlahiyyətli orqanlar BMT-nin fonduna 20 milyon dollar məbləğində təzminat tələbi ilə müraciət ediblər.

Eyni zamanda, daşqın nəticəsində dəymiş ziyanın artıq 5 milyard dollardan çox qiymətləndirildiyi nəzərə alınaraq, həmin məbləğ rəmzi xarakterli hesab edilib.

Nepal rəsmilərinin qənaətinə görə, fəlakətə məhz temperatur səbəb olub.

Himalay dağları qlobal orta göstəricidən təxminən iki dəfə sürətlə isinir və Nepal son otuz ildən çox müddət ərzində buzlaqlarının demək olar ki, üçdə birini itirib.

BMT-nin iqlimlə bağlı itki və ziyanlar üçün nəzərdə tutulmuş qlobal fondu artıq ciddi vəsait çatışmazlığı ilə üzləşib: 119 ölkədən daxil olan müraciətlər üzrə tələb olunan məbləğ 2,8 milyard dolları aşdığı halda, fondda cəmi təxminən 400 milyon dollar vəsait mövcuddur. Paris Sazişindən çıxmış ABŞ-ın töhfəsi cəmi 17 milyon dollar təşkil edib.

Xatırladaq ki, avqustun sonlarında buzlaqların əriməsi torpaq sürüşməsinə və hündürlüyü 20 metrə çatan dalğalara səbəb olmuşdu. Dalğalar saatda 180 km sürətlə şəhərlərin içindən və magistral yollarla keçib. Hadisə nəticəsində 1300-dən çox insan həlak olub, 5500 nəfər isə itkin düşmüş hesab olunur.