ABŞ dövlətinə məxsus gəmilər Panama Kanalından pulsuz keçəcək

Panama hökuməti ABŞ dövlət gəmiləri üçün rüsumları ləğv etdiyini elan etdi

“TV1” xarici KİV-ə istinadən xəbər verir ki, ötən bazar günü Dövlət katibi Marko Rubionun Panamaya səfərindən sonra Panama hökuməti dövlətə məxsus Amerika gəmiləri üçün rüsumların ləğv edildiyini elan edib.

Çərşənbə günü ABŞ Dövlət Departamenti bildirib ki, artıq ABŞ dövlət gəmiləri Panama Kanalından rüsum ödəmədən keçə biləcək.

“Panama hökuməti Amerika dövlət gəmilərinin Panama Kanalından keçidi üçün rüsum tələb etməməyə razılıq verdi,” – deyə Dövlət Departamentinin X platformasında dərc edilmiş bəyanatında bildirilir.

Qurum qeyd edib ki, bu razılaşma ABŞ hökumətinə hər il milyonlarla dollar qənaət etməyə imkan verəcək.

Panama Kanalı Administrasiyası isə hələlik bu mövzu ilə bağlı şərh verməyib.

Dövlət katibi Marko Rubio Mərkəzi Amerikaya səfəri çərçivəsində bazar günü Panama Prezidenti Xose Raul Mulino ilə görüşüb.

Panama Kanalı Tramp administrasiyasının diqqət mərkəzində olub. Panama ABŞ prezidenti Trampın Mərkəzi Amerika ölkəsini su yolundan istifadə üçün həddən artıq yüksək tariflər tətbiq etməkdə ittiham etməsi ilə gündəmə gəlmişdi.

“Əgər bu səxavətli jestin həm mənəvi, həm də hüquqi prinsiplərinə əməl olunmasa, biz Panama Kanalının tam və şərtsiz olaraq bizə qaytarılmasını tələb edəcəyik,” – deyə Tramp ötən ay bəyan etmişdi.

Panama Prezidenti Xose Raul Mulino isə ABŞ-ın kanal üzərindəki mümkün nəzarətinin qaytarılması ilə bağlı Trampın təhdidini rədd edib. Kanal əsasən amerikalılar tərəfindən tikilmişdi və ABŞ uzun illər kanal ətrafındakı əraziləri idarə etmişdi.

Lakin 1977-ci ildə ABŞ və Panama arasında imzalanmış razılaşmalar kanalın tam nəzarətinin Panamaya verilməsinin əsasını qoydu. ABŞ 1999-cu ildə birgə idarəetmə dövründən sonra kanalı tamamilə Panamaya təhvil verdi.