Brüsseldə Aİ-nin ən böyük silah sammiti keçirilir

Bu gün Brüsseldə Avropa İttifaqının (Aİ) ən böyük silah sammiti keçirilir.

“TV1” BİLD-ə istinadən xəbər verir ki, yerli vaxtla saat 12:30-da başlayan böhran sammitində Aİ-nin 27 dövlət və hökumət başçısı ABŞ-ın yeni administrasiyasının Ukraynaya hərbi yardımı dayandırmasından sonra Avropanın yaranmış boşluğu necə aradan qaldıra biləcəyini müzakirə edəcək.

İclasda Ukrayna prezidenti Volodimir Zelenskinin iştirakı da gözlənilir.

NATO-nun 5-ci maddəsinin tətbiqi zamanı ABŞ-ın yardımı belə təminatlı sayılmadığı üçün bütövlükdə Avropanın hərbi potensialının gücləndirilməsindən söhbət gedir.

Qeyd edək ki, Avropa Komissiyasının sədri Ursula fon der Leyen daha əvvəl AB ölkələri tərəfindən dövlət borcunun adi limitləri xaricində 800 milyard avroluq “Rearm Europe” planı təklif etmişdi. Müdafiə sektorunun formal olaraq səlahiyyətində olmamasına baxmayaraq, Brüssel özü 150 milyard avro ayırmalıdır. Bu pul digər məsələlərlə yanaşı, iqtisadi cəhətdən zəif ölkələrin Ukraynaya hərbi dəstəyi maliyyələşdirməsinə kömək etmək üçün istifadə olunacaq. Prioritet alışlar arasında hava hücumundan müdafiə və raketdən müdafiə sistemləri, artilleriya qurğuları və pilotsuz təyyarələr var.

Almaniyada federal seçkilərdə qalib gəlmiş ölkənin kansler postuna namizəd, Xristian Birlik (CDU/CSU) ittifaqının lideri Fridrix Merts Brüsseldə NATO-nun baş katibi Mark Rutte, Avropa diplomatiyasının rəhbəri Kaja Kallas və Ursula fon der Leyen ilə danışıqlardan sonra deyib: “Avropada sülh ancaq güclü olduğumuz halda mümkündür”. Onun sözlərinə görə, Avropanı daha təhlükəsiz və müdafiə qabiliyyətinə çevirməyin vaxtı çatıb.

Macarıstanın baş naziri Viktor Orban və Slovakiyanın baş naziri Robert Fiko artıq bu yenidən silahlanma planlarına, xüsusən də Ukraynaya əlavə hərbi yardıma qarşı olduqlarını bəyan ediblər. İtaliyanın baş naziri Ciorcia Meloni də çətin vəziyyətdədir – o, Ukraynanı dəstəkləyir, lakin Tramp və onun müttəfiqi İlon Maskla da sıx əlaqələrə malikdir. Meloni vəziyyəti düzəltməyə çalışır: onun fikrincə, Avropa və ABŞ mümkün qədər tez münasibətləri yaxşılaşdırmalıdır.