Danimarkalılar Kaliforniyanı almağı təklif etdilər
Danimarkalılar Kaliforniyanı almağı təklif etdilər – artıq 200 min nəfər petisiyanı imzalayıb
“TV1” xarici KİV-ə istinadən xəbər verir ki, Danimarkada ABŞ-dan Kaliforniyanı almaq təklifini irəli sürən ironik bir petisiya yaradılıb. İdeyanın müəllifləri bildirirlər ki, onların ölkəsinə “daha çox günəş və palma ağacları” lazımdır. Petisiya müəlliflərinin sözlərinə görə, Danimarka Trampa Kaliforniyadan imtina etməsi üçün bir trilyon dollar təklif etməyə hazırdır.
İdeya müəllifləri əmindirlər ki, Tramp Kaliforniyanı çox da qiymətləndirmir – keçmişdə o, bu ştatı “Amerikanın ən dağılmış ştatı” adlandırmış və yerli hakimiyyət orqanları ilə dəfələrlə münaqişəyə girmişdi. Petisiyada qeyd olunur ki, prezident “uyğun qiymətə Kaliforniyanı satmağa hazır ola bilər” və bu razılaşmanı daha cəlbedici etmək üçün danimarkalılar Trampa “ömürlük Danimarka şirniyyatları ehtiyatı” da təklif edirlər.
Danimarkalılar Disneylandin adını “Hans-Kristian-Andersen-Lənd” olaraq dəyişdirməyi, Los-Ancelesin hər yerində velosiped yolları salmağı və küçələrdə Smørrebrød (ənənəvi Danimarka sendviçi) köşkləri quraşdırmağı planlaşdırırlar. Mətnin sonunda Kaliforniya sakinlərinə “hüquqi dövlət, pulsuz səhiyyə və faktlara əsaslanan siyasət” vəd edilir.
