BMTM-in şöbə müdiri Vasif Hüseynovun məqaləsi “The Jamestown Foundation” tərəfindən nəşr edilib
BMTM-in şöbə müdiri Vasif Hüseynovun müəllifi olduğu “Bakı-Moskva münasibətlərində gərginlik səngisə də, dərin etimadsızlıq qalır” adlı məqalə “The Jamestown Fondation” tərəfindən dərc edilib.
“TV1” xəbər verir ki, məqalədə vurğulanır ki, son illərdə ikitərəfli münasibətlərdə yaranmış problemlərə baxmayaraq, Bakı Moskva ilə münasibətlərdə gərginliyin artmasında və eskalasiyada maraqlı olmadığını, həmçinin iqtisadi və digər əlaqələrin kəsilməsini nəzərdə tutmadığını bəyan edib.
Vasif Hüseynov məqalədə bildirir ki, Azərbaycan daim dostluq və qarşılıqlı hörmət prinsiplərinə əsaslanan münasibətlərə üstünlük verib. Bu yanaşma isə ölkənin böyük güclər arasındakı rəqabət şəraitində strateji balans və qoşulmama siyasəti ilə ümumilikdə uyğunluq təşkil edir. Eyni zamanda, müəllif Overçukun AZAL-a məxsus təyyarənin Rusiya hava məkanında qəzaya uğraması ilə bağlı məsələnin Prezident Vladimir Putinin verdiyi öhdəliklərə uyğun şəkildə, yəni qurbanlara və onların ailələrinə kompensasiya ödənilməklə həll ediləcəyinə dair təminatlarının Bakıda Moskvanın öz öhdəliklərini yerinə yetirməyə siyasi iradə göstərdiyinə dair müsbət işarə kimi qiymətləndirildiyini diqqətə çatdırır.
Bununla yanaşı, məqalədə bildirilir ki, Rusiyanın Qarabağ məsələsindən müxtəlif kontekstlərdə, xüsusilə də rəsmi İrəvanla təmasları zamanı tez-tez istifadə etməsi heç bir tərəf üçün faydalı deyil. Bu yanaşma göstərir ki, Moskva 2023-cü ildən sonra formalaşmış yeni regional reallığı tam qəbul etməyib və bu da onun niyyətləri ilə bağlı müəyyən şübhələrə səbəb olur. Müəllifin fikrincə, Rusiya münasibətləri həqiqətən yaxşılaşdırmaq istəyirsə, daha ardıcıl və səmimi siyasət yürütməli, keçmiş narrativlərinə qayıtmamalıdır.
Rusiya Prezidenti Vladimir Putin və Ermənistan Baş naziri Nikol Paşinyan arasında Moskvada keçirilən görüşə istinad edən müəllif qeyd edir ki, Rusiyanın “Qarabağ məsələsi”nə dair davamlı istinadları mövcud sülh prosesi, eləcə də Azərbaycan və Ermənistanın rəsmi mövqeləri ilə uzlaşmır. O, həmçinin bildirir ki, Azərbaycan diplomatik kanallarla operativ və qətiyyətli reaksiya verərək məsələnin tez bir zamanda həllinə də nail olub.
Yekunda, müəllif qeyd edir ki, Azərbaycan artıq etimadın bərpası üçün Rusiyadan konkret addımlar gözləyir. Xüsusilə də təyyarə insidenti ilə bağlı məsuliyyətin qəbul edilməsi və kompensasiyanın ödənilməsi vacib sayılır. Müəllifin qənaətincə, simvolik jestlər artıq kifayət etmir. Azərbaycan tərəfi hesab edir ki, Rusiyanın Qarabağ məsələsinə, xüsusilə Ermənistanın daxili siyasəti kontekstində istinad etməsi onun yeni regional reallığı hələ də tam qəbul etmədiyini göstərir.
