Türkiyənin Zəfər Bayramı Günüdür
30 Avqust Türkiyənin Zəfər Bayramı günüdür. Bu gün Türkiyə tarixində böyük bir önəm daşıyır. Zəfər Bayramı 1922-ci ildə Türkiyə Qurtuluş Savaşının ən əhəmiyyətli mərhələlərindən biri olan Böyük Taarruzun nəticəsində qazanılan qələbəni anmaq məqsədi ilə qeyd edilir.
“TV1” xəbər verir ki, Türkiyə Qurtuluş Savaşı 1919-1923-cü illər arasında Osmanlı İmperiyasının məğlubiyyətindən sonra başlayan milli mübarizə dövrünü əhatə edir.
30 avqust 1922-ci ildə Mustafa Kamal Atatürkün rəhbərliyindəki Türk ordusu Yunan ordusuna qarşı böyük bir zəfər qazandı. Bu zəfər Türkiyənin qurulması yolunda atılan ən önəmli addımlardan biri idi və Ankaranın paytaxt olduğu yeni dövlətin yaradılmasına zəmin hazırladı.
Zəfər Bayramı hər il Türkiyədə təntənə ilə qeyd olunur. Bayram günü dövlət rəsmiləri, silahlı qüvvələr və xalq bir araya gələrək, Mustafa Kamal Atatürk və Qurtuluş Savaşı qəhrəmanlarını yad edir, onların Türkiyənin müstəqilliyi və suverenliyi uğrunda göstərdiyi böyük fədakarlıqları xatırlayır.
Bu bayram həmçinin, Türk millətinin birliyini və gücünü simvolizə edir, gənc nəsillərə milli qüruru və vətənpərvərlik duyğusunu aşılayır.
