BTC kəməri ilə nəql edilən tranzit neftinin HƏCMİ
Bu ilin yanvar-iyun aylarında Azərbaycanın magistral neft kəmərləri ilə 18 milyon 513 min ton neft nəql edilib.
“TV1” xəbər verir ki, bu barədə Dövlət Statistika Komitəsinin məlumatında bildirilir.
Qeyd olunur ki, bu, 2024-cü ilin ilk 6 ayının göstəricisinə nisbətən 3,8 % azdır.
Ötən dövr ərzində nəqletmənin 75,2 %-i Bakı-Tbilisi-Ceyhan (BTC) neft ixrac kəməri ilə həyata keçirilib. Bu kəmər vasitəsilə yanvar-may aylarında 13 milyon 924,9 min ton neft ötürülüb. Bu, 2024-cü ilin eyni ayları ilə müqayisədə 3,7 % azdır.
Hesabat dövründə BTC kəməri ilə nəql edilmiş neftin 83,2 %-ini və ya 11 milyon 587,3 min tonunu Azərbaycanda hasil edilən neft, 16,8 %-ini və ya 2 milyon 337,6 min tonunu isə Türkmənistan və Qazaxıstandan daxil olan neft təşkil edib.
Bu dövrdə BTC kəməri ilə nəql edilmiş Azərbaycan neftinin həcmi 1,6 %, Türkmənistan və Qazaxıstandan daxil olan neftin həcmi isə 13,2 % azalıb.
Xatırladaq ki, hazırda BTC boru kəməri əsasən Azərbaycandan “Azəri-Çıraq-Günəşli” (AÇG) yataqlar blokundan hasil edilən nefti və “Şahdəniz” yatağından çıxarılan kondensatı daşıyır. Bundan əlavə, BTC vasitəsilə digər xam neft və kondensat həcmləri də, o cümlədən Türkmənistan və Qazaxıstan nefti nəql olunur.
AÇG-də BP (30,37 %), SOCAR (31,65 %), “MOL Group” (9,57 %) INPEX (9,31 %), “ExxonMobil” (6,79 %), TPAO (5,73 %), ITOCHU (3,65 %), “ONGC Videsh Limited” (OVL) (2,92 %) pay sahibidir.
