İşdən çıxarılan Rusiyanın nəqliyyat naziri intihar edib

İşdən çıxarılan Rusiyanın nəqliyyat naziri Roman Starovoyt özünü güllələyib.

“TV1” TASS-a istinadən xəbər verir ki, Roman Starovoytun cəsədi Odintsovo şəhər dairəsindəki evində tapılıb.

Məlumata görə, R.Starovoyta qarşı Kursk vilayətinin keçmiş qubernatoru Aleksey Smirnov ifadə verib. A.Smirnov aprel ayında Ukrayna ilə sərhəddə müdafiə qurğularının tikintisi üçün ayrılmış azı 1 milyard rublu mənimsəmə işi ilə bağlı həbs edilib.

Qeyd edək ki, R.Starovoyt 2024-cü ilin may ayından bu vəzifəni tutub. Bundan əvvəl o, Kursk vilayətinin qubernatoru vəzifəsində çalışıb.

Xatırladaq ki, bu gün Rusiya Prezidenti Vladimir Putin onun vəzifəsindən azad edilməsi haqqında fərman imzalayıb.