“Tesla” şirkətinin səhmləri niyə ucuzlaşır?
İnvestorlar İlon Maskın yeni siyasi partiya yaratmasının elektrik avtomobil istehsalçısı üçün əlavə problemlər yaradacağından narahat olduqları üçün “Tesla” şirkətinin səhmləri ABŞ-da kəskin şəkildə ucuzlaşır.
“TV1″ xəbər verir ki, “The Guardian” nəşrinin məlumatına görə, “Tesla”nın səhmləri bazar ertəsi günü birjalardakı ticarətdə 7 faizdən çox ucuzlaşıb.
Nəşr yazır ki, bu, Nyu-York birjasının açılışında şirkətin dəyərinin təxminən 70 milyard dollarının silinməsi təhlükəsi yaradır.
“Tesla” şirkətinin dəyəri 1 trilyon dolların altında qiymətləndirilir, lakin şirkətin sahibi İlon Maskın ABŞ Prezidenti Donald Trampla münasibətləri səbəbindən onun səhmləri təzyiq altındadır. İnvestorlar isə Maskın diqqətinin gündəlik işindən yayınacağı və ya Ağ Evin onun biznesini cəzalandıracağı ehtimalından narahatdırlar.
Qeyd edək ki, Donald Tramp İlon Maskın “Amerika” partiyası yaratmaq planlarını “gülünc” adlandırıb.
